أنا من أسره ملتزمه ولكن ؟

السؤال :” انا كنت مخطوبة لشاب وكانت بيننا قصة حب قوية مع العلم أننا مختلفين ؛انا من أسرة ملتزمه ولنا أخلاقنا اللي هو مختلف عنا فيها تماما لكني صممت عليه ادام أهلي واتخطبت له ، حصلت مشاكل كتير لأنه اتعرف على بنت تانيه اكتشفت علاقتهم ببعض وحاولت معاه كتير عشان أصلح منه لكن مكانش بيساعدني وانا اللي كنت دايما بحاول أصلح من طرفي مش هو ؛من غير ما يستجيب لي ؛ وبعد فترة انفصلنا…. ومن شهرين دخلت في علاقة مع شاب عرض عليا الارتباط ووافقت علطول رغم اختلافه عني في مستواه الاجتماعي ؛ والتزامه الديني لكن انا حبيته ووافقت عليه على الرغم من معارضة أهلي ليا بشدة ؛
ورغم كده حصلت بيننا مشاكل كتير وكل شوية بيهدد يسيبني وانا خايفه انه يعمل كده ويبعد ؛ومش حتحمل ده تاني
…ساعديني أحافظ عليه إزاي؟ لاني مش متحمله فكرة أني انفصل مره تانيه …

الأستاذه/ ريهام أبو سنه

الأجابه :الأخت الكريمة ….
مشكلتك من البداية كانت بسبب انه مفيش حكم سليم في اختيار شريك الحياة وكانت عندك الرغبة في الارتباط لمجرد انك ترتبطي ؛مش لأن فكرة الزواج واضحة عندك…والمفترض كنتي تختاري المناسب ليكي ولأهلك ووضعك الاجتماعي، وعلى قدر إلتزامك الديني والأخلاقي؛ واللي كان واضح جدا اختلاف خطيبك الأول فيهم عن حدودك الخاصة اختلاف كبييير….طول الوقت انتي اللي كنتي بتنقذي العلاقه؛ وكانت محاولاتك لإنجاح العلاقه من طرفك انتي ، وتقبلتيه وتغاضيتي عن عيوب في شخصيته كانت واضحه ليكي ولها مؤشرات ..لأن الخيانة

“مش أزمة أخلاق مفاجأة ” …
..العلاقة الناجحة اختي الكريمة هي علاقة متبادله بين طرفين واعيين ومسؤولين ؛و رغبة مشتركه يكملوا مع بعض بنفس الأخلاق ..

خطوبتك التانية كانت تحت نفس العنوان وخضعت لنفس تقييمك السابق في الارتباط، فدخلتي في علاقة هشه بنفس النمط ؛ مع شخص يحمل نفس العنوان ” حجرب؛ ويمكن ؛ بس موعدكيش ”
..وبنفس عاطفتك وأفكارك ” عايزة اتجوز وارتبط زي كل البنات ومش عايزة اللي أحبه يسيبني”..
علشان كده انتي محتاجه لترتيب اولوياتك في العلاقات ككل ، ومع خطيبك الحالي لازم وقفه مع نفسك أولا. ..وصححي أفكارك عن الارتباط وابدأي شوفي مواصفاته هل تناسبك وتناسب وضع أهلك ؛ وهل يصلح كأب لولادك في المستقبل،وفي الآخر حطي العلاقة دي جوه برواز جميل اسمه “الزواج” وقيميه وبصي من بعيد وانتي مستخيره ومستشيره، ..وخدي انتي القرار ومتخافيش من فكرة “الفقد” لأنه قيد للطرف التاني بيلخبط حساباته ومبيقدرش قيمتك كويس ، ولا بيقيم جودة العلاقه بينكم…سيبيله الأريحيه في القرار والاختيار ؛وإدي لنفسك نفس الحق ده وتقبلي الفكرة بقناعه ورضا وثقة في الله …
اللي يمشي من حياتك فهو زياده عليها ؛واللي حيفضل هو رزقك …