احذروا الضغط في العلاقات …

من فتره اتبعت لي اوديو عن طريق احد الاصدقاء , استوقفني اوي المثال المستخدم في فكره قوة التحمل والصبر .

الموضوع كان بيتكلم عن لو عندك كوباية مشروخة ولكنها زججها شديد وانت عارف انه يتحملفقررت تكمل استعملها .

وفي كل مره وانت بتحط فيها حاجه سخنه تتوقع ان ديه اخر مره وانها هتنفصل نصين ولكن لسه بتكمل وانت لسه مصر تحط جواها لانك كل مره تقنع نفسك انها جامده والشرخ من جوه بس .واكيد لسه تقدر تكمل لدرجة بقت تتعامل عادي ونسيت الشرخ ده ,لحد ما جه اليوم اللي جيت تحط فيها الحاجة السخنة وسمعت صوت الشرخ بيزيد وقلت ديه النهاية . و بسرعه جبت طبق عشان تلحق الكارثه قبل ما تكبر ومتعرفش تتصرف و تخيلت وقتها ان الطبق هو اللي انقذ الموقف ونسيت ان الكوبايه بقت نصين .

فكر معايا كدا بمنظور اعمق الكوبايه ديه شبهنا اوي وشبه كل علاقتنا بالاخرين شبه علاقتنا بولادنا بأزوجنا باخوتنا باصحابنا وهي يأما بنيجي علي حد كتير يا حد بيجي علينا كتير.

وهنا تكمن الفكره الاساسية هي فكره ان حد بيجي علي نفسه والطرف التاني معتمد انك بتتحمل ومكمل بتبقي نهايتها وحشه اوي او اني خلاص مش قادره اتحمل او اكمل وللاسف ديما بتيجي فجأه  بس بقه ياتري كل مره هيكون في طبق يلحق ويلم الامور للاسف مش ديما ده هيحصل اكيد هيجي يوم منلحقش فيه اللي اتكسر ولا حتي اقدر اصلحه او اعالجه اكيد كل واحد فينا له نقطة تحمل .

مثلا لما بنضغط علي اولادنا واحنا متخيلين ان في الشده المستمره والضغط ظبط للامور عشان ميفلتوش من ادينا واحنا نسيين ان ده ممكن يخلينا نفقد ولائهم وارتباطهم بينا في الكبر ويجي اليوم اللي يبقوا يا دوب بيبرونا عشان ربنا فقط .

ولما الاصحاب يمشوا بمبدأ صاحبي ده مسلم بيه ومش ممكن يقولي لا ابدا بيجي اليوم اللي يتعب الطرف المتحمل وينتج عنه توتر في العلاقه بتهمة التقصير

الخلاصه من القصه ان المفروض ان وجدنا يسند بعض نسعد بعض مش طرف يدي وطرف ياخد بلاحساب .

خلي بالكم من لحظة الانفجار قبل فوات الاوان .

خلينا نحب بعض لغرض الاسعاد وليس الاخذ .

بلاش نبقي في حياة بعض الكوباية المشروخة المنتظر تنكسر ويقع كل اللي جوها في لحظه .

لان الشعور ده بالوقت هيكرهنا حتي في نفسنا وساعتها لا هتقدر تدي ولا هتسعد بالاخذ .

اتعود تعتذر لما تتعب تقول تعبت عاوز ارتاح بدون تأنيب ضمير وشعور بالتقصير .

يبقي الاولي ناخد بالنا من بعض ,يبقي نعيد ترتيب حياتنا نشوف الاولي ناخد نفسنا ندي بحدود تحفظ لينا رحتنا .

لان للاسف احنا مش كوبيات احنا قلوب لما بتتكسر مش بتعمل صوت بتنكسر في صمت ولكن وجعها لا يحتمل

اتمني لي ولكن صلاح القلوب وراحة البال

د/دعاء اليمني .

اخصائي ارشاد اسري و تعديل سلوك .

انتقل إلى أعلى