أنا أنسانه بسيطه ومش بعبر بسهوله ؟!!!!!

 سؤال ..انا انسانه بسيطه ومش بعرف اعبر بسهوله عن اللي جوايا ،من صغري وانا كتومه ومليش صحاب لأن أهلي ربوني على اني مثقش في أي حد بسهوله وكبرت وانا مليش صحاب وعلاقاتي محدوده ومش بتدوم ..ورغم نجاحي في عملي إلا إني حاسه بوحدة فظيعه ومش حاسه بأمان..محتاجه حد أحكيله همومي ومش عارفه إزاي أعمل ده دلوقتي! وهل حقدر أصلا ولا لأ أكون صداقات وعلاقات صح بعد كل السنين دي ..مش عارفه اعمل ايه ..أرجو الرد

الأستاذه / ريهام أبو سنه

 الاخت الكريمه صاحبة المشاعر “الحساسه ” والبكر زي ما حبيت أسميكي في أول رد ليا، لأنك ببساطه ما اختبرتيش إحساس أ

يكون عندك أصدقاء وتعيشي وسط ناس بشكل طبيعي تمارسي فيه دورك وتشوفي الآخر كمان وتعرفي أن لكل فعل رد فعل، وان في غلط

وصح…لأنك زي ما ذكرتي اتربيتي على مفهوم الوحده أسلم،والناس كالإفلاس،وخلاص الدنيا مبقاش فيها خير،والكلام المريض اللي للأسف بعض

الأهالي بيزرعوه في افكار ولادهم وبيكبروا وهم فاهمين غلط،وكمان عايشين حياه غلط ..

زي وضعك اللي وصلتي له تمام … ادخلي في تجربه

صداقه مع شخصيه متكافئة معاكي وقريبه ليكي فكريا واجتماعيا علشان تختبري نفسك الأول في دايره صغيره من فرد واحد وبالتدريج مع التعامل

وتبادل الثقه بدون خوف وأعمال للعقل حتقدري تحسي بقيمة العلاقه دي ومعنى الصداقه وايه أهميتها بالنسبه لك .. احساس مختلف لما تشاركي

مشاعرك وافكارك مع ناس تحسي وانتي معاهم أد إيه متونسه بهم وحاسه بأمان وإنك مش لوحدك…..مهما الإنسان وصل لنجاح في حياته أو حقق

إنجازات مهمه بيفضل جواه حته محتاجه سند…محتاجه إيد تطبطب أو حد يفهمك ويقولك إنتي مش لوحدك على فكره ..وايه يعني لو غلطنا. .. ايه

يعني لما نتعلم علشان نكمل مطمنين ومنقعش تاني… وماله لو قلت آه تعبت ..محتاج ارتاح …. أوقات من كتر الضغط وسكوت مش صحي،بنحبس

جوانا تعبير وبنتحبس معاه مش عارفين نطلعه برانا،وبنكمل بتعب وإجهاد لمجرد الحبسه في المشاعر..أيا كانت الأسباب. .. ساعدي نفسك وحاولي،

لما تحسي إنك عايزه تقولي وتعبر يبقا الأحسن إنك تميزي مشاعرك وتقوليها وخففي عن نفسك حمل ملوش مكان ولا له داعي…. مشاركتك

مشاعرك وأفكارك مع حد تثقي فيه وتحسي إنك متونسه ومش لوحدك يساوي جرعة أمل في لحظه حياه …..