كلماتك تؤثر على نفسية طفلك…

اكيد في جملة تقدم و جملة تأخر …..

في جمله بتتقال تخليك سعيد و عندك طاقة , و في جملة تخليك مش عايز تقوم من مكانك .

احنا ساعات بنستخدم الجمل دي في حياتنا اليومية مع اولادنا من غير ما ناخد بالنا ازاي بتأثر فيهم.

طيب ازاي ابدل الجمل لولادي عشان اعرف اوصل لنفس النتيجة من غير ما اجرح فيهم او اهنهم ؟

تعالوا نشوف كدا مع بعض احنا بنقول ايه غلط ونبدله بالصح :

1 – ” هو انا كل يوم هقول لما تيجي من المدرسه تغير هدومك وتغسل ايدك وتاكل عشان نذاكر انت               مفيش فايده فيك ! ” .

نقدر نبدلها ب” ازيك حبيبي ..وحشتني. ها يابطل ورانا ايه نعمله دلوقتي ” .

2- ” انت لحقت تصلي و شكلك صليت من غير وضوء يا كذاب ” .

نقدر نقول ” حبيبي انت شكلك نسيت تتوضي تعالي نتوضي تاني عشان نتأكد ” .

3-  ” انت ليه علي طول مكتبك مبهدل وغرفتك مش مرتبة انت مهمل ” .

ممكن نقول ” ايه رايك نرتب الغرفه سوا وتقولي ايه اللي مش بتعرف ترتبه ونعمله سوا ” .

4- “درجات صحابك احسن منك انت مستواك بيقل وهما هيتفقوا عنك ” .
نبدلها ب “حبيبي درجاتك الشهر اللي فات افضل من الشهر ده تعالي نعرف فين المشكله ونحلها ” .

5- “اللي مش بيصلي هيدخل النار ويتعذب ” .
نحذرة بلطف ” حبيبي ربنا ادنا خير ونعم كتيره اوي واحنا بالصلاه بنقول لربنا شكرا علي هذه النعم ” .

6- ” انت جبان وخواف ”
نغيرها ب ” حبيبي لو حاسس انك خايف قولي عشان اساعدك لانك انت طول عمرك بطل ومش بتخاف من حاجه ”

7- “صحابك بيضربوك عشان انت ضعيف وخواف ”
نفهمه بطريقة مختلفه ” انا فخوره بيك عشان انت بتحترم نفسك ومش بتقلد التصرفات العدوانية وعارف ان الدفاع عن النفس قوه بس ليها وقتها المناسب ”

و اخيرا ,

كل جملة سلبيه تهد كيان طفلي وتحوله الي كائن مريض سلوكيا
وكل جمله ايجابية ببني بيها طوبه في جدار اخلاقه بقويه بيها واخليه صلب لا يقهر

فكروا شويه قبل ما ينطق لساني بكلمات ممكن تهد كيان صعب بناءه مره اخري

د/دعاء اليمني
اخصائي تعديل السلوك

انتقل إلى أعلى