أحذري استخدام تلك الجمل مع ابنائك !

دكتور/دعاء اليمني اخصائي تعديل السلوك و ارشاد اسري .
دكتور/دعاء اليمني اخصائي تعديل السلوك و ارشاد اسري .

في شوية مفاهيم وكلام بنردده للاسف لاولادنا لا مناسب لسنهم ولا متوافق مع احتياجاتهم… يجب الابتعاد عنها تماما لانها تساهم في ضعف شخصيتهم منها :

-اياك تتحرك من مكانك اقعد واثبت….
ده ازاي اصلا اقوله لطفل وخاصة في سن مادون السابعة ده احنا كده بنعذبه الطفل لازم يتحرك ويستكشف ما حوله وبلاش اقارن طفل بغيره لان في اطفال طبيعتها الحركة الكتير ده مش معناه انه مريض فلازم اسمح بالمساحه ديه واحترمها

-بلاش عياط مفيش راجل يعيط….
جملة حطمت مشاعر اجيال ليه ميعيطش ويعبر بصدق عن مشاعره محدش فينا بيختار يزعل اكيد او يتك علي زرار يبسطه او يحزنه خلي ابنك يعبر عن السعاده والحزن بصدق وعفويه الافضل من نهره انك تعلميه ازاي يعدي الموقف ويتعامل معاه.

-لو عملت كذا او كذا انا هحبك اكتر….
بلاش تقرن افعال ابنك بحبك الطفل محتاج حب طول الوقت غير مشروط بتصرفات او اعمال كويسه او استجابات لرغباتك…لان الشروط في الحب والاحتواء بتهز ثقة الطفل بنفسه ويتخيل ان اصغر خطىء يصدر منه يساوي كره من اسرته لازم نفرق كويس اوي في وصف المشاعر لاولادنا لانها بتفرق اوي في حياتهم

-انا مخصماك ومش بكلمك…
اللي يغلط ميكلمنيش…..
ازاي يعني امال يروح لمين ويعرف غلطه
ازاي هيفهم انه غلط اصلا ومحتاج يصحح مفهوم او تصرف….ارجوكم متقطعوش حبل الصداقه والتفاهم بينكم وبين اطفالكم بجمله متعرفوش اثارها عليهم

-مفيش نقاش لازم تقول حاضر ومتسألش ليه…
ياسلام يعني ايه يقول حاضر وبس من غير ما يفهم السبب ويتشرح ليه اسبابه ويتسمح ليه يرفض او يقبل
وده يتعلق بأختيار اكله ولبسه وطريقة تسريح شعره بيحب يروح فين مش بيحب ناس معينه كل ده حقه ومن حقه يقول لا ….علموا اولادكم ثقافة لا مش من باب العند والرفض وخلاص ولكن لا لفتح باب للنقاش

-انت كدا ومش هتتغير مفيش منك امل …..
انا كدا خلاص صنفت ابني وحاصرته في مربع الفشل وانه مش هيخرج منه ده يخليه اما مستسلم ومتقبل فكرة الفشل والضياع او متمرد رافض اي توجيهه حاقد علي كل انسان ناجح.

نصيحة اخيرةخلي بالك وانت بتزرع صفات اولادك بأيدك اتركوا لاولادكم حرية التعبير والرفض والنقاش والبكاء واللعب والحركة .

انتقل إلى أعلى
× تريد المساعدة؟