المقصود بتنمية الذكاء العاطفي تنمية قدرة الطفل علي التعرف علي مشاعره المختلفة في المواقف اللي بيمر بيها ، و تنمية قدرته علي التعبير و التعامل مع المشاعر و قدرته علي تفهم وتقدير مشاعر الاخرين .
المهارة دي بتساعد الطفل انه يتواصل مع نفسه و مع اقرانه بشكل أفضل و بتساعده كمان انه علي المدي البعيد يكون شخصية ناجحة و محبوبة و مؤثرة .
في المقال ده حنعرفكم علي ٦ طرق مفيدة في تنمية الذكاء العاطفي للطفل .
- تعريف الطفل اسماء المشاعر المختلفة زي الحزن و الفرح و الخوف و الغضب و الملل و الفخر و الاحباط ….)
- نستغل المواقف اللي بيتعرض لها الطفل و نتكلم معاه عن مشاعره و نعرفه بيها زي اننا نقوله انت حاسس بالحزن علشان لعبتك ضاعت !!
أو انت حاسس بالفخر انك عملت مجهود و جبت درجة حلوة !
وهكذا .. و نسمح له يقبل مشاعره ويفهم الرسالة اللي وراها . - نتقبل مشاعر الطفل و نسمح له يعبر عنها بحرية بدون ما ننكرها عليه او نسخر منه أو نتجاهلها .
- تدريب الطفل علي التعامل مع المشاعر غير المريحة او الصعبة زي شعور (الغضب ) مثلا ، باننا نوجهه ان مشاعره من حقه لكن سلوكه محتاج يتحكم فيه و ميتصرفش بشكل يئذيه او يئذي الاخرين ونعلمه طرق صحية للتعبير عن الغضب و تهدئة النفس زي الرسم و الحركة و تمارين التنفس و التعبير بالكلام بدون سلوك عنيف.
- نتكلم عن مشاعرنا ونعبر عنها و نسمح ان الحوار ده يكون موجود ، و ممكن نقرأ للطفل قصص عن المشاعر ده بيساعده يتعلم اكتر .
- تشجيع الطفل علي السلوك الاجتماعي و التعامل مع اطفال اخرين ، و فتح حوار معه عن مشاعر الاخر في المواقف المختلفة و ازاي ان تقدير المشاعر احتياج مهم لنا و لغيرنا .
أ/ مروة الحبشي
أخصائية الارشاد النفسي والتربوي والعلاج المساعد بالفنون