أزمة منتصف العمر عند المرأة

أزمة منتصف العمر

”  هو انا كبرت ..ولا مش قادره اتحمل خلاص…..

   كتير بفكر هو يعني ايه اتحمل عشان اكمل….

   تقصدوا الصبر …ولا المقدره علي الصبر…       “

سمعنا كلنا عن أزمة منتصف العمر وانها بتغير المود والاحساس وبتغير الفعل ورد الفعل اللي جوانا….

بس طالما قلنا انها ازمة فلازم من العقل اننا نفكر ازاي ندير تلك الازمه وازاي اعديها بسلام .

بس الاول هو ايه شكل الازمه ديه ؟

1.نظره غريبة لشكلي وشعور بخوف من الكبر وتسلل لملامح العجز التي بدأت تظهر في ملامحي وتضارب بعدم التصديق (ايه ده هو انا كبرت).
2.شعور بفقدان شئ لا اعلمه (حسه ضايع مني حاجه).
3.خوف من مجهول (فقد…موت….مرض….فشل…خيانه)..
4.اختلاط المشاعر والاحساس بالامان….
(فجأه تلاقي حد يقولك ياحاجه….وفي نفس اليوم حد تاني يقولك انتي لسه صغيره والعمر قدامك…..شاب كبير يقولك ياطنط….رجل او امرأه كبيره تقولك يابنتي) ايوه بقه انا مين ؟؟
5.شعور البنت اللي جواكي وانك نفسك ترقصي او تجري او تضحكي بصوت عالي او تلبسي لون غريب وفجأه حد يقولك ده مش هيليق عليكي ده بتاع بنات صغيره….تسكتي وتحافظي وتعملي حساب الكلمه….يجي حد يقولك ايه الكئابة ديه يا بنتي انتي لسه صغيره اوي علي كدا…..
6.احساسي بثقل المسؤليه واني خلاص مش قادره اشيل .
7.العصبيه الغريبه والغير مبرره وشعوري الدائم اني اتظلمت .
8.احساس غريب بأن عمري راح مني ومحدش مقدر مجهودي ومش بيشكرني .

تلاقي نفسك بتسألي نفس السؤال انا مين ؟

المرحله ديه ليس لها بداية محدده ولا معلوم نهايتها…ولكن كل ما اعلمه عنها انها حقيقة .

ولكن تختلف في الاعراض وردود الافعال من انسانة لاخري حسب الظروف والمستوي الاجتماعي و قوة المسؤلية التي فوق اكتفها…..
ولكن الشعور واحد انا مش انا …انا تعبت ….انا حسه مش قدره اكمل…. انا مضغوطه وعاوزه اصرخ……

طيب في الفتره ديه انا محتاجه ايه ؟

  1. فكري في نفسك وحاولي تسعديها
    2.كل واحده فينا عندها حاجه بتحبها حاولي ارجعلها
    3.مارسي اي نوع من الرياضة المفضله حتي لو كانت المشي
    3.حافظي علي عباداتك وصلاواتك لانهاتساعد بفضل الله علي الخروج من الخوف والاكتأب..
    5.خلي حياتك متنوعة مفيش حاجه اسمها كبير وصغير انا مش بعمل حاجه حرام او عيب حبي نفسك
    6.الاهتمام بالمظهر واعادة نظارة بشرتك وجسمك للوزن المثالي مفتش اوانه انا من حقي ابقي حلوه وراضيه عن شكلي طول سنين عمري…
    7.اتصلي بصحابك وقرايبك اللي كنتي بتشعري معاهم بالراحه والسعاده…مقابلة شهريه معاهم كفيله تغير مودك طول الشهر وتسعدك جدا…
    8.اخلقي جو رومانسي مع زوجك ليكم فقط ولا تستخدمي كلمات محبطة احنا كبرنا راحة علينا الزمن مش بيرجع ….ديه كلمات منفره وبتقتل كل مشاعر بنكم….
    9.خافي علي صحتك اوي اوي لان محدش حينفعك
    10.خليكي واثقه انك مهمه اوي وانك ميزان بيتك ووجودك فعال حتي لو مفيش حد قال ده
    11.خليكي متأكده ان اللي فات من عمرك يجب ان تفتخري بيه وانه مضعش هباء ابدا وان انجازك في تربية ابناءك وحبهم ورعايتهم وسام تستحقي عليه كل الشكر

واخيرا , 

اخلقي من الازمه افكار جديده ومن العدم وجود ومن الخوف امل جديد…..
لا يستطيع احد ان يحيا بلا امل وخطط للغد …..
كوني ام وقت اللزوم….وزوجة كامله…..وبنوتة لا تكبر….وسيده عاقله تدير كل الامور

اعزك الله زهرة الحياه ……

لمتابعة حلقات أزمة منتصف العمر 

دكتور/دعاء اليمني
اخصائي تعديل السلوك
والارشاد الاسري والتربوي

انتقل إلى أعلى