تعرفي على سر بناء علاقة قوية مع ابنائك

امهات كتير بتسألنا : ازاي اقوي علاقتي بابنائي ؟ 

التصريح الدائم بحب اولادنا = بناء صداقة متينة

”  ايه الكلام ده هو انا لازم كل شويه اقول لابني انا بحبك واخد بنتي بالحضن عشان يعرفوا اني بحبهم !

هو مين اللي بيذاكر لهم مش انا…
هو مين اللي بيعمل اكلهم مش انا…

هو مين اللي بيسهر ويطلع عينه وهما تعبانين مش انا…
هو مين اللي مش بيشوف راحه ولا بيتهني بالقمه مش انا……
كمان احب واطبطب واعلن عن حبي …

المفروض هما حاسين ومستوعبين انا بعمل عشانهم ايه وبضحي قد ايه براحتي
مش كل ده بيقول اني بحبهم… ” 

لا ده مش بيقول انك بتحبيهم ….

تعالي اقولك الطفل بيفكر ازاي..

الطفل كائن لا يعرف المنطق يشعر بالاشياء بطريقة مختلفة .
مثال , هو ميعرفش يوصف طعم الاكل اللي بتعمليه… مثلا مش ممكن يقولك هو رافض ياكل ليه ميعرفش يحلل الاشياء بعقله مش هيقولك انتي زودتي الملح او ناقصتي ….او ان الاكل مش مستوي اوي طري زياده…
هو بيعمل رد فعل بالرفض بشكل مباشر وبدون شرح ولا مقدمات…….

ااااه يعني لما حضرتك تحضري الغدا وتذاكري وتغسلي وتسهري و….و….و
مش هيقول في عقله يااااا الست ديه بتحبني اوي لانها كذا وكذا وكذا

وصلت……
معني كدا انه مش بيفهم الا الحاجات المباشره ومع الوقت واكتساب الخبرات يبتدي يفكر زينا …..ويقول ده حصل عشان كذا ….لما يحصل كذا يبقي افهم كذا

فهمتوا المعني من التصريح واعلان الحب لابناءنا

غير ان التصريح بالكلمه له وقع اخر في نفسية الطفل
وهفكرك بحاجه
افتكري طلب طلبتيه من ابنك وانتي مكشره وصوتك عصبي كان رد فعله ايه

وطلب طلبتيه بكلمه حلوه وابتسامه كان رد فعله ايه

تعرفي ان الحب والاهتمام وتعمد اظهارهم بيدي ثقه بالنفس اكتر من مليون نجاح وتقدم هيشوفوا….

تعرفي ان التعود علي اظهار المشاعر معالج نفسي بدون طبيب لمعظم مشاكل اضطرابات السلوك والعادات العصبيه اللي مش بنلاقي ليها اسباب قاطعية…

غير ان في حاجه اسمها عدوي الحب …..يعني البيت اللي بيظهر حبه ومشاعره لبعض لما بيدخلوا فيه اشخاص اخري زي زوج بنتك او زوجة ابنك بيتعدوا ويمارسوا ده بتلقائية

يعني انتي هتعملي اتنين×واحد
هخلي بيتي سعيد ومتحاب وكمان هعلم ولادي ازاي يحبوا ويعملوا بيوت سعيده

كل مره بكرر نفس الجمله في اخر كل مقال
السلوك مش ارشاد….السلوك ممارسه مع الولاد.

انعم الله عليكم بالحب والسعاده

دكتور/دعاء اليمني
تعديل سلوك وارشاد اسري

موضوعات مشابهه

سلسلة حلقات الصداقة في حياة اولادنا 

كيف نقيم علاقة اجابية مع اطفالنا ؟

اتعلموا ازى تحبوا أولادكم ؟

تم إقفال التعليقات.

انتقل إلى أعلى
× تريد المساعدة؟