بنتي عنيدة وعصبية وصوتها عالي

السلام عليكم

انا عندي ٢٧ سنة معايا رودينا ٦ سنوات الا شهرين وعبدالله عنده ٦ شهور

رودينا مدخلتش مدرسة بس كانت بتروح حضانة وبيدرسوها حلو ومدخلتش لظروف حصلتلي انا وبابها مادية

الفكرة ان رودينا بعد مجيئ اخوها وتصرفاتها بقت وحشة جدا

عصبية وبتزعق وتكلم بصوت عالي وتعيط بصوت عالي لان بنبقى اغلب الوقت مقيمين مع الجد والجدة نظرا لظروف خاصة فبيبقى كلامهم

ان لما هي تزعق ونا ازعقلها يتدخل الجد ويقول وطو صوتكم عاوز انام الا اخره

المهم بقت بتصرف بعدائية معايا مرة حطتلي صبون فالحمام فالارض ودخلت اتزحلقت والمرة اللي بعدها حطتلي كريم فالارض واتزحلقت ولما سالتها بتعملي كدا ليه ردت وقالتلي انتي بتزعقي كتير فانا بعمل كدا عشان بتزعقيلي وتعاقبيني ايه الحل معاها يادكتور

ومبتسمعش الكلاااااام ابدا حتى لو حايلتها مفيش فايدة

الأخصائي : عبدالله يوسف

الاجابة :

من البداية بنتك محتاجه تحس بإهتمامك بيها شويه وهنا جزئين للحل بإذن الله
الجزء الاول علاقتك بيها
1- شاركيها اهتماماتها
2- خصصي 30 دقيقة على الاقل لعب معاها في وقت ثابت يوميا
3- قللي إستخدام البنت للفون والاجهزة اللوحية وأستبدليها بأنشطة الرسم و التلون وغيرها من الانشطة المفيدة والممتها مع مشاركتها للأنشطة
4- لا تحرميها من حضنك الدافئ وحدوتة قبل النوم
الجزء الثاني
فكرة وطريقة العقاب أصلا غلط من البداية تأديب مش عقاب فرق كبير بين التأديب والعقاب وعشان التأديب يحصل بشكل يعقبه تعديل وتغيير في السلوك يبقي لازم تمري بالمراحل دي
1- فهم وادراك الخطاء
يعني لازم تفهمي انت انها فهمت الخطأ وعرفت انه خطأ
2- الاعتذار عن الشئ الغلط للأشخاص المعنين بالاعتذار
مش يغلط في حقك يعتذر لجده مثلا
3- إصلاح الخطاء لو مش هتنضر البنت لو صلحته أو المشاركة بالقدر اللي مايضرهاش
يعني لو كسرة حاجه وهتنضر لو لمتها يبقي تشارك في لمها بمساعدتك اما لو مش هتنضر تصلح الغلط كله وينخصم من مصروفها تمن الحاجه اللي كسرتها او جزء من تمنها
4- الاجراء التأديبي اللي بيقولوا عليه عقاب
ويكون من نفس جنس الخطأء

وأخيرا ممنوع
1- الضرب
2- الرسائل السلبية
3- تعديل السلوك المستمر الملاحقة
4- المقارنات بأقرانها
5- الشكوي منها امام الناس
6- وأخيرا قربي من بنتك